Siyasət

“Brüssel görüşünün təsnifatı Azərbaycanın suverenliyi məsələsinin gündəliyin əsas müzakirəsi olduğunu göstərdi” – RƏY

“Brüssel görüşünün təsnifatı Azərbaycanın suverenliyi məsələsinin gündəliyin əsas müzakirəsi olduğunu göstərdi”.

Bu fikirləri “Report”a açıqlamasında Milli Məclisin deputatı Aydın Mirzəzadə deyib.

O qeyd edib, artıq altıncı dəfədir ki, Brüsseldə Avropa İttifaqı rəhbərliyinin təşəbbüsü ilə Azərbaycan Ermənistan liderləri arasında görüş keçirilir:

“Bundan əvvəl intensiv şəkildə ABŞ-da dövlət katibinin iştirakı ilə hər iki ölkənin xarici işlər nazirlərinin görüşü keçirilib. Bugünlərdə isə Rusiya Azərbaycan və Ermənistan liderlərinin iştirakı ilə regiondakı vəziyyətlə bağlı sammit keçirilməsi təklifini irəli sürüb. Bütün bunlar onu göstərir ki, Azərbaycanın ərazi bütövlüyü, Azərbaycan-Ermənistan münasibətləri dünya liderlərinin diqqətindədir. Bunlar heç də heç də regionda problemi həll etmək naminə deyil. Bütün bunlar vaxtilə Ulu Öndərin, indi isə cənab Prezident İlham Əliyevin apardığı düşünülmüş daxili və xarici siyasət nəticəsində baş verib. Yəni Azərbaycan sözügedən məsələni dünya siyasətinin tərkib hissəsinə çevirməyi bacarıb”.

“Danışıqlarda müzakirə edilən mövzuların təsnifatı Azərbaycanın suverenliyi məsələsinin gündəliyin əsas müzakirəsi olduğunu göstərib. Hər hansı məsələ bizim torpaq itkimizə gətirib çıxara bilməz. Baxmayaraq ki, Ermənistan vaxtaşırı suverenliyimiz, sərhədlərimizin dəyişdirilməsi, ölkəmizin daxili işləri ilə bağlı mövqe bildirməyə, həmin məsələlərə müdaxilə etməyə çalışıb. Amma Azərbaycan bunları qətiyyətlə rədd edir. Azərbaycan Ermənistanı özünün ərazi bütövlüyü kontekstində məsələləri müzakirə etməyə məcbur edib. Müzakirə edilən mövzular bu gün Ermənistanın da marağındadır. Azərbaycanın ərazi bütövlüyünün təmin edilməsi Ermənistanda inkişaf üçün bir əsas ola bilər. Həmçinin, Türkiyə ilə sərhədlərin açılması Ermənistanın inkişafına və dünyaya çıxışına kömək edəcək. Ermənistan istər-istəməz şüuraltı bütün bunların olduğunu özü üçün yəqin edir. Ancaq hələ də həm Ermənistan müxalifətində, həm də iqtidarında vəziyyəti Vətən müharibəsindən əvvəlki vəziyyətə dəyişmək cəhdləri də vaxtaşırı edilir”, – deputat əlavə edib.

“Bunların isə qarşısı qətiyyətlə alınır. Diqqəti cəlb edən, bu dəfə müzakirə edilən mövzularda Qərbi Azərbaycandan vaxtilə zorla çıxarılmış əhalinin öz dədə-baba yurdlarına qayıtmaları məsələsidir. Ermənistan bilməlidir ki, Azərbaycan bu problemi də diqqətdə saxlayır və xalqımızın bir hissəsinin öz tarixi torpaqlarında yaşamaq hüququnu həmişə müdafiə edəcək. Azərbaycanın mövqeyi göründüyü kimi beynəlxalq hüquq normalarına və suverenlik hüquqlarına tamamilə uyğundur. Ermənistanla danışıqlar zamanı ancaq və ancaq ərazi bütövlüyümüzün Ermənistan tərəfindən təkcə sözdə deyil, eyni zamanda sənədlərdə qəbul edilməsi əsas götürülür”-, o, qeyd edib.

A.Mirzəzadə vurğulayıb ki, Laçında sərhəd-buraxılış məntəqəsinin qurulması ilə Azərbaycanın sərhəd bütövlüyünü təmin edib:

“Azərbaycan ərazilərinə giriş-çıxış ancaq və ancaq Azərbaycan qanunlarına uyğun aparıla bilər. Görüşdə konkret nəticələr əldə edilməsə də, Ermənistan bir daha Azərbaycanın mövqeyini bildi. Azərbaycan Ermənistanla sülh müqaviləsini bağlamağa hazırdır. Bu isə ilk növbədə Ermənistan Azərbaycanın ərazi bütövlüyünü tanıması və daxili işlərimizə qarışmaması, qoşunlarını çıxarması sayəsində mümkün ola bilər. Brüssel danışıqları da bu fikri birmənalı şəkildə yenidən göstərdi”.

Mənbə:Report

xeberler

Related Articles

Bir cavab yazın

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir

Back to top button